تدري وش اللي يجرح القلب جرحين
ويمد حبل الحزن فيك ويشده
انك تناظر طفل من غير ابوين
يمشي ودمعه سايل فوق خده
منظر صعيب ويقسم القلب قسمين
لاقام يمسح دمعه بكف ايده
يمشي ولا يدري طريقه على وين
لين التعب من كثر ماتاه هده
اثقل حروف يشيلها فيه حرفين
لا اب يدري به ولا ام ترده
في خطوته رحله ودمعه وسكين
وحظ توسد بالمراسي مخده
جيت اساله بالله قلي ولد مين
وبغي يجاوب وختنق صورت رده
انا يتيم ومال لدربي عناوين
وجزر الحزن فيني يساوي لمده
وطعم الطفوله ما عرفته لها الحين
وثوب السعاده صرت ماني بكده
ابكي اللي من شفت غيري سعيدين
لين البكا فيني يوصل لحده
واقفي ورحت امسح دموعي من العين
وعيني تناظر دمعته فوق خده
وهذا الي يجرح القلب جرحين
ويمده حبل الحزن غصب ويشده
مما راق لي
